كتابة سكريبت الموشن جرافيك

لو انت لسة بادئ في مجال الموشن جرافيك

ومش عارف أنت اللي تكتب الاسكريبت ولا العميل اللي يجيبلك الاسكريبت جاهز ولا مين اللي يكتب الاسكريبت؟

ولو أنا اللي هكتب الاسكريبت أكتبه إزاي؟

الحاجات دي كلها إن شاء الله نعرفها في المقال 💁

السلام عليكم ورحمة الله وبركاته.

اهلا بيكم والنهارده هنتكلم عن الاسكريبت أو السيناريو للموشن جرافيك أهم مرحلة من المراحل أو كل مراحل الموشن جرافيك لو حبينا نتكلم عنها

★ كلها تبدأ من إن فيه فكرة ثم الفكرة دي بتنفذ أو تصاغ في شكل اسكريبت أو سيناريو ثم تعليق صوتي ثم ستوري بورد ثم رسومات ثم تحريك وهكذا دي المراحل فاحنا إن شاء الله في كل أسبوع كده نحاول نتكلم عن موضوع من المواضيع دي بتفصيل أكتر إن شاء الله.

★ النهارده هتكلم عن الاسكريبت والسيناريو وزي ما قلنا يعني ده أهم حاجة في العمل

✓ لأن هو الأساس هو اللي على أساسه هيكون أو هيظهر التوجه بتاع الفيديو أنت هتعمل الفيديو شكله إزاي؟

من الاسكريبت بتاعه أنت عايز تعمله بشكل ساخر, شكل حزين, شكل مهيبر كده, شكل كلاسيك يعني حسب ما أنت عايز الفيديو بتاعك هيتوجه من خلال الاسكريبت طبعا الاسكريبت ده أو السيناريو أساس كل حاجة

يعني أنا بصور حلقة يوتيوب بكتب لنفسي سيناريو أو اسكريبت أنا هعمل المقدمة الأول ثم هتكلم عن كده ثم كده ثم كده ده تقريبا سكريبت اليوتيوب

كذلك الموشن جرافيك الموشن جرافيك في الغالب بيكون الاسكريبت بتاعه أو السيناريو بتاعه متعلق بالتعليق الصوتي أو بالكلام اللي هيقرأه المعلق الصوتي

طيب عشان بس ما نتوهش في الكلام هنحاول نقسم المقال ده نقاط معينة النقاط اللي هتكلم فيها اللي هي

أول حاجة

هل أنا اللي أكتب الاسكريبت ولا العميل ولا حد متخصص؟

النقطة اللي بعد كده إن شاء الله هتكون

لو أنا اللي هكتب الاسكريبت ايه الحاجات اللي أراعيها؟

في نقاط كتيرة مهمة جدا هنتكلم عنها في الموضوع ده.

النقطة التالتة

لو عايز تجيب حد متخصص يكتبلك اسكريبت إزاي بوصله أو الكلام ده؟

ويلا بينا نبدأ 🔥

★ أول حاجة هل أنا اللي بكتب الاسكريبت ولا العميل ولا حد متخصص؟🤔

✓ طبعاً يعني أكيد حد متخصص هو اللي بيكتب الاسكريبت لأنه بيكون حد فاهم هو بيعمل إيه غير أما أنت تكتب أنت راجل بتاع موشن جرافيك أو راجل مصمم أيا كان مش تخصصك ولو هتكتبه مش هيطلع بالقوة بتاعة لو حد متخصص بيكتبه

✓ فلذلك يفضل دايما إن أنت ما تكتبوش ولكن أحيانا بتطالبك الظروف يجيلك العميل وأنت في بداية طريقك فالموشن جرافيك يجيلك العميل يقولك أنا عايز أعمل فيديو موشن جرافيك ولكن أنت اكتبلي الاسكريبت أو أنت مش عايز العميل زي ما بيقولو كده يهرب منك

فبتقولو خلاص أنا هكتبلك الاسكريبت وفنفس الوقت أنت مش عارف توصل لحد يكتبلك اسكريبت ومش عارف أسعاره كام ومش عارف برضو مواعيدو إيه ومش عارف تقول للعميل إيه فالموضوع ملخبط شوية

لكن أنا بتكلم إن المفترض أو المسار الصحيح إن حد متخصص هو اللي يكتب الاسكريبت أو السيناريو بتاع الفيديو الموشن جرافيك أو أي حاجة أصلا لازم يكون حد متخصص

★ ثانيا لو أنت اللي هتكتبه يعني خلاص احنا وصل بينا الحال أو المطاف إن أنت اللي هتكتب الاسكريبت ايه الحاجات اللي تراعيها أثناء الكتابة دي النقطة اللي بنتكلم عنها دلوقتي إن شاء الله

★ لو أنت اللي بتكتب الاسكريبت 👈 أول حاجة تحاول تاخد من العميل أكبر قدر ممكن من التفاصيل • هو عايز يعمل اسكريبت لايه بالظبط يعني؟

• هل هو عايز يعرض فكرة معينة أو منتج معين؟

• هل هو عنده مشكلة معينة أو تطبيق عايز يبين للناس إزاي تستخدمه؟

أيا كانت الفكرة يعني أولا لازم يكون فيه فكرة على أساسها بيتم كتابة الاسكريبت هتعرف إيه الفكرة أو إيه المضمون اللي عايزو للفيديو.

👈 ثانيا بتحاول تاخد منه أكبر قدر من التفاصيل

👈 ثالثاً لو بتكتب أنت الاسكريبت حاول يكون جمل مختصرة ما تكونش جمل زي ما قلنا قبل كده انشا أو جمل تعبيرية حاول تكون جمل تقدر تتنفذ في الموشن جرافيك وفي نفس الوقت ما يملش المشاهد منها وفي نفس الوقت تكون مختصرة وتدي الخلاصة بتاعة الحاجة اللي أنت عايز توصلها للمشاهد (مثلاً) أنت بتتكلم عن تطبيق ما تسرحش وتتكلم في حاجات تانية بعيدة عن الموضوع حاول تتكلم في مضمون الموضوع

✓ والحاجة الأفضل لو أنت مثلا تعرض المشكلة الأول مثلاً إن أنا بعمل تطبيق لتصليح عربيات مثلاً الاول تعرض المشكلة للعميل ، أنت بتواجهك مشكلة في تصليح عربيتك مش عارف توصل لمش عارف ايه دي المشكلة تعرضها في الأول بشكل مختصر.

ثانيا بتخش في الحل بتاعك أنا عندنا تطبيق كده كده مثلاً يعني فريق الحاجات السريعة هسيبلكم برضه رابط مقالة كويسة لموقع سنابل هتساعدك في كتابة الاسكريبت 👇 https://www.sanabil.tv/blog/Arabic/motion-graphics/script/2019/4/21

نرجع لمرجوعنا إن احنا قولنا يا تعرف الفكرة من العميل اكتب أو تاخد منه أكبر قدر من التفاصيل وبتكتب بشكل مختصر الاسكريبت وبتكتب إنك بتعرض مشكلة في الأول ثم بتعرض حلها مثلاً لو أنت بتتكلم عن حاجة معينة تاني حاجة تحاول تخلي فيه شكل كوميدي في الموضوع أو مش شرط يكون كوميدي يعني يفضل إنه يكون في فكرة لو أنت مثلا هتعمل حاجة ممكن تعملها بشكل كوميدي في البداية أو تعملها بشكل مؤثر في البداية بحيث تشد الانتباه بتاع المشاهد في البداية بعد كده بتكمل بعرض الفكرة بتاعتك.

💥 طيب لو أنا خلاص هكتب فعلياً أهو عندي التفاصيل وعندي البيانات هكتب الاسكريبت شكله إزاي؟

⚠️ نركز في الحتة دي سواء تكتبه على الوورد تكتبه بإيدك أيا كان بتحاول تكون في أربع أعمدة يعني إزاي؟

تيجي ( في الأول ) مثلاً تقسم أربع أعمدة عمود لرقم المشهد اكتب ميم مشهد اتنين تلاتة أربعة مثلاً اكتب في (العمود التاني) النص المقروء أو النص اللي هيقوله المعلق تكتب برضو النص الأول الأساسي بتاعنا في ( العمود التالت ) هتكتب وصف المشهد لو أنت عندك وصف معين لكل مشهد هتقسم العمود التاني المشاهد بتاعتك تمام؟

تمشي على العمود التالت تعمل وصف لكل مشهد ( العمود الرابع ) لو عندك ملاحظات معينة أو عندك نص هتكتبه يظهر على الشاشة مثلاً رقم معين أنت عايزه يظهر يعني أحياناً بتيجي بترسم ممكن تعتمد على الكلام فقط لأ لكن أنت لو عايز حاجة تنكتب بتوضحها في العمود الرابع فده بالظبط يكون شكل الاسكريبت بتاعنا👇

رقم المشهد، النص اللي هيقرأ، وصف كل مشهد بعد كده اللي هو لو عندك ملاحظات معينة أو كده دي كانت النقطة اللي هي لو أنت اللي هتكتب الاسكريبت لو أنت لجأت للموضوع لكن ما يفضلش طبعاً

💥 فاحنا نروح بقى للنقطة اللي بعدها اللي هي منين أوصل لحد يكتبلي الاسكريبت حد متخصص يعني لو عايز حد يكتبلك الاسكريبت

يا سيدي عندك أكتر من طريقة في مواقع العمل الحر يعني بدون ذكر أسماء أكتر منها فيه سواء العربية أو المواقع اللي هي موقع التواصل عموما أنت لو عملت بوست هتلاقي ناس بتعمل منشن وإشارة لناس تانية بتكتب اسكريبت عادي جداً في جروبات التصميم تبحث عن أي جروبات تصميم بتلاقي برضو ناس بتكتب اسكريبت.

أي حد بحيث يكون مرجع لأي حد بيدور على سكريبت يتواصل مع الناس الموجودة ويبقى الجميع استفاد

💥 طيب نيجي لنقطة بردو مهمة جداً اللي هي لو أنا مثلا هجيب حد متخصص يكتب الاسكريبت الأفضل إني أوصله بالعميل

يعني أنا جالي عميل وعندي حد بيكتب الاسكريبت وأنا بعمل الموشن أفضل أوصلهم لبعض ويتواصلوا مع بعض وادوني اسكريبت بعد كده ولا أنا اخد البيانات من هنا واديها للاسكريبت؟

والله دي بتعتمد على مدى ثقتك في الاسكريبت تايبر يعني ممكن الاسكريبت تايبر اللي انت وصلته بالعميل ممكن يكتبوا سكريبت مع بعض ويشوفوا حد تالت يعملهم فيديو الموشن فانت تبقى في المهلبية خالص

✓ حسب ثقتك بالاسكريبت تايتر وحسب برضو أنت يعني فاضي تاخد المعلومات من هنا وتروح تبعتها للاسكريبت وتاخد السكريبت بعد ما اتكتب تعرضه عالعميل وتتم الموافقة

✓ فحسب دي ترجعلك أنت حسب ثقتك في الاسكريبت تايتر وفي العميل وحسب أنت فاضي ولا مش فاضي إنك تقوم بالمهمة دي فكانت دي نقطة مهمة جداً فلازم نذكرها

فنراجع مراجعة سريعة كده على المقال اتكلمنا عن أهمية الاسكريبت وثانيا اتكلمنا عن أنا اللي أكتب الاسكريبت ولا العميل ولا حد متخصص؟ زي ما قلنا حد متخصص وقلنا لو انا اللي هكتبه ايه الحاجات اللي أراعيها وإن الفكرة ثم الاختصار في البيانات ثم إنك تعرض مشكلة ثم تعرض حلها اثناء ما أنت بتكتب الاسكريبت

💥 وحاجة رابعة اللي هي عدد الكلمات لو أنت متفق مع العميل على سكريبت أو فيديو مدته دقيقة فتيجي تكتب سكريبت يبقى عدد الكلمات يكون متوسط ١٠٠ ل ١٢٠ كلمة ده يقدر يديك دقيقة تمام في التعليق يعني 💯

✓ يديك تقريبا دقيقة عشان ممكن تكتب أنت سكريبت طويل جدا وتفتكر إن ده دقيقة

✓ وإزاي تعمله ممكن تعمل ليه اختبار أنت بتيجي بالمايك مثلاً وتسجل بعد ما كتبت وتشوف طلع معاك قد ايه بالظبط وتجرب تسجل بصوت سريع صوت متوسط وهكذا يعني بحيث تعرف هيكون دقيقة تقريبا ولا لأ زي ما قلنا

يكون الموضوع مختصر بقدر الإمكان ده هيساعد في حاجات كتيرة لأن هيوصل فكرة للمشاهد وهيختصر عليك انت وهيسهل عليك انت الشغل بدل ما تلاقي عبارات صعبة إنك تحولها لموشن جرافيك فدا كان باختصار مقال النهاردة اللي هو اتكلمنا فيه عن الاسكريبت واشوفكم في الدرس الجاي إن شاء الله 💁

والسلام عليكم ورحمة الله وبركاته