اغرب خمس نصائح عشان تتعلم الموشن جرافيك او عشان تتعلم اي مجال في الجرافيك

⚡ يلا نبدأ بأول نصيحة

النصيحة الاولى واللي هي تنفيذها صعب جدا اللي هي لازم تكون شغال شغل تاني بجانب تعلمك للموشن جرافيك او للجرافيك عموما 💁

وده لسبب بسيط جداً ان انت بدأت تتعلم مجال الجرافيك عموما او اي مجال اي تخصص اي برنامج بتيجي في نص الطريق كده او اول ما بدأت بعد شهر او شهرين تلاقي نفسك كسلت

وبالاضافة ان انت عايز عائد مادي من الحاجة اللي انت بتتعلمها دي 💰 فممكن متكملش حتى لو كنت بتحب الحاجة دي ممكن متكملش فيها

فالموضوع ده مهم جدا إن تكون شغال شغل بيجيبلك دخل وبجانب الكلام ده انت بتتعلم علشان حتى متستعجلش انك يجيلك عائد مادي او كده تكون انت شغال في شغل بيجيبلك مقابل مادي أياً كان الشغل ده

بس طبعا بيكون مجهود كبير ان انت تكون شغال شغل اساسي وتروح مثلاً تذاكر موشن او جرافيك او كده😩

بس الموضوع ده مهم جدا وبيفرق كتير في استمراريتك لان انت لو فضلت متفرغ كده وبتتعلم مثلاً في الفوتوشوب مثلاً

ممكن متكملش وانا اعرف ناس كتيرة جدا بتبدأ وهم شباب مثلاً مش شغالين او عاطلين عن العمل مثلاً وبيتعلم جرافيك مبيكملش لانه بيلاقي انه مستعجل النتيجة ولسه شغال في اساسيات ومستواه متطورش ومجالوش شغل فممكن بيمل بسرعة وبيزهق بسرعة

لكن لو انت شغال شغل جنب تعلمك بتلاقي نفسك تقدر تكمل

⚡ أما النصيحة التانية اللي هي

اشتغل ببلاش بعد ما تبدأ تتعلم 😇

اتعلمت الاساسيات فتلاقي نفسك عايز تطبق حاجات عملية حاجات فعلية وما فيش حد جاي لك عشان تعمل برتفوليو أو معرض أعمال

فانت ممكن تعمل شغل افتراضي من دماغك تفترض ان انت اي براند تعمله حسب ما انت بتتعلم

او انك تعرض على عملاء انك تعملهم شغل ببلاش 😊 وكذلك لو عايز تتدرب في شركة ودي حاجة مهمة جدا ممكن تعرض على اي شركة

لان شغل الشركات غير الشغل انك شغال فريلانسر في البداية مينفعش لازم تبدأ بشركة بيفيدك جدا الموضوع ده

ممكن تروح لاي شركة قريبة منك مثلا تعرض عليهم انك تشتغل معاهم شهر مجاناً مثلا

الموضوع ده يفرق جدا وهيفيدك جدا جدا💪 الفكرة في كده ان انت لازم تشوف يا إما تعمل شغل للعملاء ببلاش لإما تشوف شركة تشتغل معاهم برضو حتى لو بمقابل بسيط او بدون مقابل في البداية فقط

دا هيفيدك جدا هيعلمك الشغل بتاع السوق فعليا غير الشغل اللي انت بتتدرب مع نفسك بتلاقي نفسك بتعمل حاجات على مزاجك لكن لما تكون في شركة وعميل معين لا انا عايز الحتة دي من المكان الفلاني ومن الفيديو الفلاني او التصميم الفلاني هتلاقي نفسك مجبر انك تدور وتبحث فبتتعلم.

⚡ النصيحة الثالثة والمهمة جداً اللي هي ما تستعجلش النتايج يعني هي بديهية جداً يعني ولكن كلنا بنقع فيها 👌

اللي هي انا اتعلمت شوية … طيب فين المقابل؟

زي ما قلنا يعني اصبر شوية واسعى دايما واستمر في تعلمك واستمر في تطورك وانشر اي حاجة بتعملها في مواقع التواصل هتيجي النتيجة ان شاء الله

فمتستعجلش النتائج وكل شيء بوقته ⏳ في كيرف للنجاح انه يبقى مثلا انت اتطورت شوية فالكيرف يطلع فوق تفضل فترة كبيرة الكيرف ثابت زي ما هو لو صبرت وكملت زي ما انت فجأة هتلاقي الكيرف ده طلع لفوق جدا

متعرفش منين تصبر و تتعلم و تنشر شغلك تعرض على ناس شغلك وهكذا

⚡والنصيحة الرابعة اللي هي غريبة شوية بس دي بعدين يعني دي مش في البداية اللي هي

كل فترة وقف شغل للعملاء لو امكانياتك المادية تسمح بكده وطور من مستوى شغلك ✍️ بمعنى ايه؟🤔

معناه انت خلاص اتعلمت مثلاً كام شهر واشتغلت لمدة سنة و بتنتج فيديوهات مستواها معقول او كويس وحسيت ان مستواك ثبت لفترة طويلة

انا بتحصلي كتير احيانا من فترة لفترة بحس ان ثابت مبتجددش فبضطر أوقف شغل

لان لما تيجي تذاكر مثلا وتطور من نفسك يجيلك شغل وهكذا فتلاقي جايلك فلوس بمقابل فمينفعش تذاكر ومينفعش ترفض الشغل وهكذا 🙆

فلو انت مادياتك تسمح بان انت كل فترة توقف شغل وتطور من نفسك اوكي

⚡ ‏النصيحة الخامسة والاخيرة

اللي هي لا تعتمد على التيمبلت ايا كان مجالك ايه

موشن جرافيك - تصميمات سوشيال ميديا ايا كان متعتمدش على التيمبليت

انك تجيب حاجة حد عاملها فانت بالتالي خلاص فين الفكر بتاعك فين الابداع بتاعك متعتمدش عليه التيمبليت دا في البداية خالص

في ناس بتستسهل بتجيب تيمبليت تعدل عليه وهكذا خلاص دول داخلين المجال على اساس انه مكسب ليهم وكدا مع ان ده بيضرهم أصلا يعني بيفضل مستواهم ثابت فترة كبيرة ويفضل لهم حدود سواء في السعر في العملاء وكده

لكن متعتمدش على التيمبليت حاول تعتمد دايما على شغلك انت وفكرك انت

فدول كانوا الخمس نصايح نراجع عليهم بسرعة

☑️ اتعلم الجرافيك جنب شغل ليك ايا كان الشغل ده حتى ان شاء الله تشتغل اي شغلانة كارد ☑️تاني حاجة اشتغل ببلاش في البداية سواء شركة سواء لعملاء فريلانسر في البداية فقط. ☑️ تالت حاجة متستعجلش النتايج واصبر يا عم ☑️ رابع حاجة وقف شغل كل فترة وطور من نفسك ☑️ وخامس حاجة لا تعتمد على تيمبليت او التصاميم الجاهزة بس كده

بس كده واتمنالكم كل التوفيق

لو حابب تشوف باقي المقالات من هنا 👇

https://sonidesigner.com/

لو حابب تتطلع على الدورات والورش والباقات من هنا👇

https://www.sonicourses.com/