لو خلاص بدأت مجال الجرافيك او هتدخل مجال الجرافيك وناوي تبقى مصمم جرافيك

فهنتكلم عن بعض النصايح اللي هتفيدك خلال مسيرتك إن شاء الله👌

✅ لو انت بدأت بالفعل تبدأ في مجال الجرافيك وبدأت تذاكر في برنامج الفوتوشوب مثلاً

ذاكر ولو بشكل بسيط يومياً 😌

متجيش تدخل بقى على البرنامج بكل حماس اللي هي حماس البدايات ده

وتذاكر تلات أربع خمس ساعات وتيجي تاني يوم وتالت يوم وما تكملش وترجع تاني بعد كده وهكذا

متدخلش الدخلة الجامدة دي حاول تذاكر لو قدر بسيط يومياً زي ما في الحديث الشريف – أن رسول الله صلى الله عليه وسلم ُسِئَل: أيُّ العملِ أحبُّ إلى الله؟ قال: (أدومه وإن قل)

فانت لو تخصص كل يوم مثلاً نصف ساعة هيكون افضل من انك تذاكر ثلاث ساعات وتنقطع بعد كده فنقطة الاستمرارية دي مهمة جداً انها تشيل منك رهبة البرنامج او رهبة التطبيقات والكلام ده

✅ وانت بتذاكر بالفعل حاول تطبق مباشرة ✍️

يعني تشوف الدرس، تشوف التريكة اللي عملها المدرب أو اللي بيشرح، توقف الفيديو، ترجع تطبقها مباشرة وهكذا. متفضلش مستمع كده وساكت لأ لازم تطبق في استمرار.

✅ متستعجلش التنائج👀

ما تفكرش إن انت من يوم وليلة هتبقى مصمم جامد والكلام ده وتطلع شغل جامد. لأ الموضوع عايز صبر زي ما قلنا بالاستمرارية وبالصبر إن شاء الله توصل لمستوى كويس جداً.

✅ لو أنت بتذاكر مثلاً متبدأش على اليوتيوب مثلاً أو اي كورس متبدأش إلا اما تتأكد إن الكورس ده مكتمل للنهاية👍 تشوف المحتوى بتاعه قبل ما تبدأ فيه عشان ما تبدأش وتشوف درس واتنين وبعد كده تتفاجئ ان اللي كان بيعمل الكورس مثلاً ما كملش فيه أو كده

فلازم تتأكد من الكورس ده كامل لحد النهاية وعلى الأقل فيه كم كبير من المعلومات عشان ما توقفش النص وده يخليك تضطر تبدأ من أول مع حد تاني وهكذا

✅ مهم جداً جداً تهتم بصحتك من حيث ضهرك وعينيك 🙇👀

يعني كل نص ساعة كده حاول تغمض عينيك وتفتحهم وتبص بعيد عشان ما يحصلش جفاف في العين من كتر النظر والتركيز على الكمبيوتر 💻 نحاول كذلك تقف مثلاً كل نص ساعة زي ما قلنا كده تعمل اي تمارين اي حاجة كده بحيث تريح نفسك 🏃

النصايح اللي فاتت دي تعتبر يعني نصايح للناس اللي هتبدأ او بدأت بشكل بسيط 💁

فمعانا بقى مجموعة نصائح تانية للناس بدأت بالفعل أو بقالها فترة بادئة

✅ما تقبلش مشروع أو شغل اكبر من قدراتك بمقابل 💰 بمعني ايه بمقابل؟

يعني متاخدش عربون او متاخدش فلوس أو مقابل من العميل والشغل أو المشروع اللي جاي لك دا انت شايفه اكبر من قدراتك ومش هتكمله وممكن متأديش بشكل جيد

فهتخسر العميل وهتخسر زي ما بيقولوا كدا سمعتك وغير كدا هتخسر وقت كتير انت اجهدته في حاجة هي أكبر من قدراتك في الوقت الحالي

ولكن انت لو حابب تتدرب وحابب تطور نفسك ممكن تقبل الشغل ده ولكن زي ما قلنالك بدون مقابل بحيث انك تطور من نفسك. بحيث يبقى انت مضرتش العميل في حاجة.

✅ النصيحة اللي بعد كدا وأنا شخصياً كنت بغلطها اللي هي متحاولش تخلص المشروع او الشغل

او التصميم اللي أنت شغال عليه في نفس الجلسة أو في نفس اليوم 🙅🏻‍♂️

كنت بقع في الموضوع دا كتير اني خلاص لازم أفنش التصميم بقى كده وألاقي نفسي ايه حصل اني انهيته وإنه منتهاش بشكل مرضي فمفيش اي مشكلة مش شرط المشروع او الشغل يخلص في نفس اليوم

خليه يخلص لتاني يوم تالت يوم مفيش أي مشكلة 💁‍♂️

طالما انت مش مرتبط بوقت تسليم او وقت التسليم لسه بدري

✅ لو أنت خلصت الشغل او خلصت التصميم متبعتوش للعميل على طول لان احنا بنكون مخلصين بقى أو متخيلين ان بذلنا مجهود وواو وكده 🤩 ‏لأ انت طالما لسه في ديد لاين او لسه وقت التسليم بدري

‏متبعتوش للعميل يفضل لو تعرضه على صديق ودي نصيحة داخل النصيحة ‏تعرضه على صديق لك في نفس المجال👬 ‏ويكون صادق في نصايحه هيشوف بعين تانية أو بعين العميل أو بعين ناقد غير ما تشوف أنت اللي تعبان فيه

‏فانت بالنسبالك دي حاجة واو. ‏لكن وهو بيشوفها ممكن يقولك على حاجات معينة. ‏وانت كذلك طالما خلصت التصميم بدري استنى لتاني يوم أو تالت يوم وشوف التصميم مرة تانية ‏هتلاقي ممكن تضيف حاجة تعدل حاجة وبعد كده ابعته للعميل. ‏

✅ ‏ لو انت خلاص دخلت سوق العمل وهتشتغل بالفعل لازم تاخد عربون من العميل 💰

خد العربون مهم جداً

العربون بيكون ازاي؟

مثلاً اتفقت على التصميم ده بميت دولار مثلاً خلاص انت بتكتبله زي ورقة او زي عقد كده : أعمل لك التصميم الفلاني بالسعر الفلاني هتدفع عربون خمسين في المية قبل البدء في العمل وبعد تسليم المشروع او بعد الانتهاء من المشروع مثلاً باقي المبلغ مدة التنفيذ كده كده والمطلوب... تكتب كل التفاصيل دي يُفضل يعني

فالمفترض انت بتاخد مقابل لشغلك

وتأكد تماماً إن العميل اللي هيدفع عربون هيدفع باقي الشغل وتأكد تماماً برضو ان العميل اللي مش عايز يدفع عربون فغالبا مش عايز يكمل الشغل او مش جاد في الشغل

لكن اللي هيدفع عربون ده راجل جاد في الشغل وعايز يشتغل فعلاً وعلشان تكون برضو ايه الدنيا تمام انت توريه معرض أعمالك، وتوريه شغلك 👀

بحيث ان هو يبقى متخيل الشغل ازاي وخلاص بيدفعلك عربون وتبدأ على طول

والنقطة بتاعت اللي هو دفعلي عربون وأنا خلصت الشغل هل اسلمه الشغل على طول ولا اسلمهوله بجودة أقل ولا اسلمهوله بعلامة مائية

أنا عن نفسي بقول لنفسي دايما إن العميل اللي بيدفع عربون اكيد هيدفع باقي الشغل فبديله الشغل عادي مفيش اي مشكلة

لو انت مش حابب تسلمه الشغل لنفسه بأعلى جودة ممكن تقلل الجودة شوية ممكن تحط علامة مائية بس خفيفة متكونش صادمة كده

✅ النصيحة اللي بعد كده وهي نصيحة مهمة جداً اللي هي

اعرض شغلك بعد ما تخلصه على العميل في شكل موك اب

انت عملتله شعار لوجو مثلاً او تصميم سوشيال ميديا او بيزنس كارد أو حتى فيديو اعرضه في شكل موكاب

لما يشوفه العميل بشكل موكاب فبشوفه مثلاً لو بيزنس كارد او كارت شخصي لما تحطهوله كده لزق في وشه كده الصور بحجم كبيرشكلها مش حلو

لكن لما تحطهوله في شكل موكاب لطيف كده فيشوف الحاجة بشكل تخيلي فهيكون شكله أفضل

فدي كل النصايح اللي كانت معنا 🤩

بس كده وبتمنالكم كل التوفيق

لو حابب تتطلع على الدورات والورش والباقات من هنا👇

https://www.sonicourses.com/